資深影評人皮亞講到今年奧斯卡頒獎禮賽果，佢覺得少咗去年共同戲謔美國總統Donald Trump嘅政治主題，亦一如所料，呼應#metoo呢個熱門話題，皮亞就覺得：「但俾人一種偽善嘅感覺，一方面順應民意回應#metoo，安排咗三位曾經遭性騷擾受害女星勇敢上台（編按：即艾絲莉茱爾（Ashley Judd）、Annabella Sciorra及莎瑪希恩），向去年所有『非白人男人』嘅電影工作者致敬。

「短片最後一段仲刻意安排《不得鳥小姐》導演（Greta Gerwig）講話，致敬前頒改編劇本獎俾gay film 《Call me by your name》（以你的名字呼喚我），致敬之後頒劇本獎畀歧視黑人片《Get Out》（訪‧嚇）。」

皮亞覺得，呢個完全係今年奧斯卡嘅「劇本」安排，但係另一方，最佳電影同導演嘅《忘形水》，戲中女主角又回歸傳統，求愛女人角色為愛而生，佢補充：「似乎又刻意將描寫女性相對堅強硬朗嘅電影、好似《廣告牌》（Three Billboards Outside Ebbing, Missouri）、《戰雲密報》（The Post）壓落去，好似話畀人聽，唔可以唔認同#metoo，但又叫企起身站群情洶湧嘅#metoo女人，快啲返回座位。」