【澳職】傳周二宣佈停擺 最後一戰噴射機2:1力克墨城
蘋果日報 2020/03/23 19:00
澳職紐卡素噴射機墨爾本城
噴射機靠烏加高域的遠射絕殺墨爾本城。
禮拜一本身就有澳職嘅雙料娛樂，等各位已經餓波好耐嘅球迷過足睇波癮，點知尾場嘅珀斯光輝鬥西部聯就因為疫情關係，最後都係取消收場，得返頭場第二位嘅墨爾本城作客鬥尾三嘅紐卡素噴射機。
而呢場閉門上演嘅獨腳戲都爆出冷門，臨完半場前噴射機前鋒費斯格拉特禁區內乖巧扭過兩個守衞射入，幫主隊先開紀錄。雖然下半場70分鐘墨城有中場貝倫古亞尾柱接應傳頂入扳平，不過8分鐘後，噴射機再靠烏加高域靚絕遠射領先，最終主場出擊以2:1擊敗近年往績佔優嘅墨城，全取三分。
不過踢噴射機對墨城嘅比賽之前，已經有消息傳出禮拜一澳洲足總、澳職賽會，同埋11支聯賽球隊嘅代表開會，估計喺禮拜二早上就會宣佈澳職正式停擺，換句話說家下足智彩所有會開盤嘅賽事，都會全數暫停。
今仗繼續在空場之下比賽。