雖然基斯坦奴朗拿度（C朗）周六助皇家馬德里歷史性衛冕世冠盃，但賽後受訪就暗示自己未必可以喺皇馬退休，仲話唔到佢話事，而《阿斯報》就乘機大造文章，話會長佩雷斯同C朗之間關係已轉差，全因呢位皇馬最高領導人，喺金球獎頒獎典禮當日受訪嗰陣，似密謀有一日會踢走C朗。

C朗賽後咁回應記者：「如果可以，我當然想喺度掛靴......但係呢個決定唔係我話就係，我唔係掌控呢間球會嘅人......」C朗所指掌控球會嘅人，當然就係佩雷斯。呢位歷來世冠盃最多入球球員，同捧金球獎當日話想喺皇馬掛靴嘅回應，有好大出入，皆因佩雷斯當日曾經咁講：「對我嚟講，C朗當然係迪史提芬奴後，最能代表球會同最全面嘅皇馬球員，係佢嘅繼承者，但就好似迪史提芬奴咁，喺C朗之後都會有另一個新世代出現。」

《阿斯報》話C朗對會長呢句說話非常介懷，亦意識到對方終有一日，會搵人接替佢嘅地位，而且一直有傳就係目前效力巴黎聖日耳門嘅前巴塞隆拿球星尼馬。佩雷斯喺金球獎頒獎典禮，亦曾經被問過收購尼馬嘅睇法，當時佢咁答：「尼馬？聽落係幾吸引！」