車路士射手迪亞高哥斯達（DC）呢個幾月俾中超轉會傳聞玩到陀陀擰，試過被指扭計搞到俾領隊干地雪藏，天津權健又衝出嚟話斟過佢，西班牙傳媒Cadena SER周五仲話DC已經同某支中超球隊達成共識，將會喺夏天加盟。唔知周中對利物浦射失12碼關唔關心煩氣燥事，但DC卒之都係忍唔住，周五喺ig出post雙語廣播表示「佢哋講得太多狗屎啦！」

干地周五喺賽前記招亦要第N次回應DC離隊傳聞：「每個禮拜我都聽到好多有關DC嘅揣測，但我諗目前最重要嘅事情係集中爭標，尤其我哋處於有利位置。」如果DC今晚對阿仙奴keep住呢團火，阿仙奴後防真係要睇路！