短線遊：
上飛鵝山尋兩棲動物香港蠑螈
蘋果日報 2004/02/07 08:00
香港蠑螈好Cutie！(左)
喂，哥仔你睇夠未，睇完就唔該放番我落水。(右)
唔講唔知，原來國父孫中山母親楊太君，死後喺港境安葬，墓穴位置喺飛鵝山，好接近百花林。要去一啲都唔難，清水灣道落車，徒步直上飛鵝山道，到達飛鵝山莊就揀右邊小徑行，會有路標指示百花林方向，沿石梯行10分鐘，墓穴就在眼前。
百花林係風水福地，故沿途不乏其他富貴人家墓穴，有神棍重話楊太君下葬飛鵝山翌年，孫中山即得祖先庇佑，革命成功，信唔信就真係見仁見智喇。
墓穴呈環形，前置麻石大平台，方便有心人參拜，唔好以為墓穴一開始就咁豪裝，原本只不過係個簡陋嘅土築墳墓，多得台灣方面喺1975年撥款30萬重修，華僑旅運社又喺墓旁興建多個涼亭畀遊人休息。參觀完墓穴，腳力夠嘅話，不妨出番飛鵝山道登東山，視線可及九龍半島同西貢海峽，個景靚到你唔信。
涼亭隔籬有條樓梯，順行西貢古道直出蠔涌，正式展開尋找蠑螈之旅，古道唔算崎嶇，但遇天雨就自然路滑，帶備行山杖比較穩陣，記清楚喇，行多20分鐘，會發現另一涼亭，旁邊有小徑直通溪澗，蠑螈係兩棲類動物，鍾意喺呢類溪澗石群間蒲頭。
畀貼士大家，蠑螈多數喺石罅出沒，佢哋一身保護色，同石頭融為一體，唔好走漏眼呀。
上一堂生物課先，香港蠑螈身長約15厘米，無鱗片，滑潺潺，深褐色，腹部有橙紅點。陸地上，蠑螈勁懶，唔係好郁，但一跳落水，就好似啪咗興奮劑咁，成隻醒神晒，游嚟游去無時停，因為要搵小魚、蝦毛等食物充飢；到繁殖季節，雄性蠑螈甚至會為爭女大打出手。
Macro大膽將蠑螈放上手：「好Cutie喎，靜靜哋趴喺度，郁都唔郁！」蠑螈天性馴良，唔會咬人，不過大家千祈唔好捉蠑螈返屋企飼養，因為佢係香港受保護動物，一經定罪，最高可被判罰款10萬元同入獄1年，睇完一定要放生。
重拾古道往蠔涌，唔想走冤枉路，記住行大藍湖村小徑，20分鐘一定去到車公廟，沿途風景一般，最搞鬼係個公廁，頂頭大大隻字刻上蠔涌中英文名，其中一幅牆重用紙皮石砌條加勒比海珊瑚礁鯊，兼有文字詳細介紹鯊魚特性，嘩！唔知重以為去咗海洋公園，睇完隨時唔記得入公廁方便。
無錯，沙田車公廟最多人識，但多人識唔代表最正宗，話你聽，其實蠔涌車公廟先係正貨，何解？話說車元帥保護宋帝昺南逃，當時西貢出現妖獸，殺害村民牲口，車元帥瞓身助民滅妖，車公去世後，村民興建一座車公廟作紀念；點知後來沙田又爆發瘟疫喎，居民惟有入蠔涌請車公像出沙田，另建車公廟保平安，不過入面供奉嘅車公像，只不過係車元帥個孫。雖然已過年初三，但有心唔怕遲，記得轉埋風車至好走呀。
臨走，Yuko同Macro喊餓，一於炒番幾碟先出市區，推介金喜茶餐廳，乾炒牛河、咕嚕骨飯、潮州炒飯（各$26）大大碟夠鑊氣，好味到唔停得口。
金喜茶餐廳（27198657）
地址：西貢蠔涌4號巴士站側。
交通
去程：彩虹地鐵站乘91號巴士（$6.1），清水灣道德望學校下車，依飛鵝山道徒步上山。
回程：匡湖居乘92號巴士（$5.5）回鑽石山地鐵站。
去程：彩虹地鐵站乘91號巴士（$6.1），清水灣道德望學校下車，依飛鵝山道徒步上山。
回程：匡湖居乘92號巴士（$5.5）回鑽石山地鐵站。