當年今日
關於我們

【搭膊頭行街】堅稱同老婆關係冇變 詹秉熙照叫顏仟汶上屋企

蘋果日報 2018/06/21 17:35

搭膊頭SANDY顏仟汶詹秉熙離婚

57歲嘅前無綫小生詹秉熙,上月被傳因為搭上契妹顏仟汶,而同結婚30年嘅太太Sandy分居,事後詹秉熙孭晒上身話係自己唔好:「答埋今次之後唔會再回應了,請諒解,我和太太本身已有些問題的,唔關任何人事,係我唔好、係我變咗。處理中、多謝關心。」顏仟汶亦否認介入。(新聞連結: https://bit.ly/2lp0lNG )
不過日前又有報道話詹秉熙同顏仟汶搭晒膊頭行街,仲一支煙兩份食,今日詹秉熙現身尖東出席店舖開幕活動,最初佢避談同顏仟汶嘅報道,對顏仟汶早前曾話不再沉默,要出嚟澄清,佢話:「呢啲你哋要問番佢先得。」之後再問搭膊頭行街嘅事,佢就話:「我哋係好朋友嘛,當時都有其他人喺度㗎,不過淨係影住我哋兩個。」報道出街後,佢話同顏千汶都有聯絡過,大家都係得啖笑。
咁o依家太太Sandy係咪要離婚?佢話:「千祈唔好咁講,佢係我太太,我哋冇嘢,大家齊齊整整。」但係太太有冇因為呢啲報道到而嬲?佢話:「咁大家都熟,都係朋友,又唔係唔識,又唔係唔知。」咁使唔使同太太解釋番件事?佢好Man咁話:「使乜解釋呀?明㗎啦嘛。」
以後會唔會少啲同顏仟汶見面減少誤會?佢話:「咁呢樣就唔關我事啦,有時安排工作唔到我揀,如果喺工作場合上碰到咪碰到囉。」係咪以後會避免再叫顏仟汶上你屋企?佢又反問:「上屋企有咩問題呢?個個都咁上嚟㗎啦,啲朋友成日都上嚟燒嘢食,無問題㗎,大家朋友。」
精選娛聞,喺晒《娛果》
http://fb.com/appledailyent
empty
詹秉熙日前被發現搭住顏仟汶行街,佢堅持係好朋友。
empty
至於同太太嘅關係,佢答:我哋冇嘢,大家齊齊整整。
empty
會唔會避免叫顏仟汶上屋企?佢反問:「上屋企有咩問題呢?」
empty
詹秉熙同顏仟汶係契兄妹。(資料圖片)
empty
早前有傳顏仟汶經常上詹秉熙屋企,令詹秉熙太太不滿。(互聯網圖片)