日前謝霆鋒喺佢個大陸節目《十二道鋒味》中施展揈蕉一招，搞到啲網民O晒嘴（新聞連結： http://bit.ly/2mRQDHa ），更令霆鋒連日嚟成為網絡紅人，多咗好多人細心兼研究佢啲廚藝。

唔知係咪霆鋒知道大家對佢揈蕉好感興趣，噚晚小編喺《鋒味》facebook度貼咗條片，解開揈蕉之謎！

影片連結： http://bit.ly/2mW8Y5A

嗰段片長約3分幾鐘，拍攝背景喺落住雪嘅街頭，段片一開始霆鋒就話：「我一定要解釋畀你哋聽究竟呢個香蕉係點嚟嘅……即係點剝（皮）呀……」然後佢就問笠晒帽避雪保暖嘅爸爸謝賢（四哥）：「你記唔記得我細個點樣引我笑，教我開香蕉先？」唔知四哥係真係唔記得，定怕凍想快啲收工，佢把口不停話「唔記得」。

霆鋒邊係啲咁易放棄嘅人吖？佢就邊喺手上嗰梳蕉中搣咗兩隻蕉出嚟，再配合動作話：「你記唔記得你會攞住兩隻蕉，跟住你會扮西部牛仔，你就話『嗱，隨時可以咁樣嘅（將兩隻蕉分別放喺腰嘅兩旁），揸住呢兩個椗位，一咁揈（手勢向下chok）就開到隻蕉』，你記唔記得呀？」

四哥把口話唔記得，身體卻很誠實，佢接過霆鋒手上嗰兩隻蕉，親自示範，仲爆咗個秘技，喺個蕉椗位做少少手腳——即係「咪咪佢」，就會成功揈到隻蕉。不過，因為隻蕉太生，所以四哥無法成功咁示範到點樣（可以好chok咁）剝蕉皮。

而平日cool爆嘅霆鋒，喺鏡頭面前突然變晒個細路仔咁，不停提細個同四哥之間嘅「鬼馬」事，講到好開心好興奮，仲爆四哥有起椰青肉秘技，又話要拍番條片畀觀眾睇。

據知，呢條片係2014年霆鋒搵四哥做《鋒味》嘉賓時嘅其中一集嘅內容。

咦，咁唔知霆鋒幾時搵四哥找數，示範用匙羮完全起椰青肉呢？

相關新聞：
【翻chok史…】霆鋒Joey踩枱齊跌 網民笑摺枱像威化般乾脆
http://bit.ly/2nnHTDL

【Google打個「威」字出啲乜？】霆鋒鐵粉威靈頓牛扒 婷婷都想睇
http://bit.ly/2opYvNc

《蘋果》第十二屆金話梅電影選舉（Golden Plum）又嚟喇!由今日起，請在以下網址（ http://campaign.appledaily.com/goldenplum2017 ）投票，選出心目中的爛片之霸，截止日期係4月6日，賽果將於香港電影金像獎舉行前夕（4月8日）揭曉。