時裝設計師鄧達智今日接受《蘋果》訪問，他表示今早得知林燕妮離世消息：「係呀!我朝早先聽到，噚晚都有朋友講，但係未經證實，之前都傳過，大家誤以為佢走咗，佢冇屋企人，佢個仔好難聯絡，佢(秘書)打俾其他朋友，我係由其他朋友口中得知，我哋都有共同朋友，佢以前無綫啲舊同事，一大班人仲有同佢聯絡。」

鄧達智指林燕妮於2011年患肺炎後，曾舉行新書簽名會籌款，他說：「我暗中笑佢係唔係有新書出，所以搵《蘋果》搞大佢，佢睇落冇事，其實可能嗰陣已經有事，只不過係未浮面，兩年前佢患肺癌，另外一樣嘢，佢要開始醫，咁耐一段時間，佢都要食藥，個人好浮腫，舊年年尾，我哋有朋友生日食飯，佢個樣係靚，你知佢化妝同着衫都好靚，但係外貌同身材都好腫，佢都講明嗰晚唔可以影佢，就算影到都唔准公開，大家有默契。」

鄧達智回想那次是最後一次見面，她未有向友人講自己病況，他續言：「嗰晚食飯有朋友係知道，大家都唔講，最近有朋友講佢身體好差，朋友都想去探佢，不過佢唔俾人去，好可惜，因為佢係個好好玩嘅人嚟，佢對朋友好有義氣，佢係我返香港，最早期認識嘅朋友之一，係好偶然，當時佢幫《明周》寫時裝，當時有人喺林燕妮面前講起我，林燕妮想識你，睇下第時可唔可以俾啲料佢寫稿，就係有日食飯識咗佢，識咗三十幾年。」