王菀之(Ivana)一連兩場《下北沢的北極光2018音樂會》噚晚喺麥花臣場館完滿結束，老公蘇卓航(Eric So)同黃偉文(Wyman)親身到來欣賞尾場，音樂會以旅行為主題，Ivana喺歌與歌中間不停同樂手傾談旅行經歷，更直問中學同學兼今次音樂總監馮翰銘去旅行時係咪2個去3個返，對方尷尬承認。

音樂會中段，Ivana走落台行近觀眾獻唱，期間Wyman捉實佢自拍，當Ivana見到老公時突然「嘩」一聲，然後夫婦兩人握手，之後喺台上獻唱《融了鐘的時間》時，Ivana專登望著老公唱出歌詞「敢講非你不嫁」，全場歡呼叫喊，佢本人就打冷震。音樂會尾聲，Ivana一邊唱一邊將台邊相片拎起抛到台上，佢話：「原本啲相係收錄喺我部舊電話裏面，我唔記得咗密碼，都有少少唔開心，但係我自己又諗，我用心去嗰個地方，個刻嘅心情，應該係留喺我個心裏面，而唔係留喺啲相度。」最後獻唱《迷失藝術》便結束，但觀眾喺場館4次宣佈完騷仍不肯離開叫encore，最後Ivana再上台清唱《我真的受傷了》才完滿結束。

Ivana指綵排時樂隊每一個人都有幽默感，導演提議加插一半做棟篤笑，但Ivana好擔心得自己一個有反應笑，所以繼續主要分享音樂，佢話：「講嘢都幾緊張，所以事前都有準備，不過有一半就睇現場嘅反應，今晚反應好熱情，所以自己都冇咁怕醜。」講到向老公示愛，佢怕醜話：「因為現場氣氛令我唔怕醜到呢個地步，平時會諗放喺邊個位盡量唔好畀人見到，因為佢又怕醜，我又怕醜，頭先好溫暖，大家瞬間好似變成好多朋友咁。」至於係咪想去旅行2人去3人返，她笑指自己有自己幸福而避談，稍後要接拍電影，所以時間會好充實。

精選娛聞，喺晒《娛果》
http://fb.com/appledailyent