網上電台「青台」成員蘇兆康去年5月出席立法會政改公聽會時，想衝向政制局局長林D9抗議，被保安人員攔阻並帶離場，事後被判守行為一年。呢單「畸士」原來仲有手尾，立法會保安報稱攔截時受傷，獲保險公司賠工傷，保險公司近日向蘇兆康追討9,600幾蚊費用。
今年29歲嘅蘇兆康現職電訊技工，佢同八方講人工好奀，忽然被追討成萬蚊，令佢十分閉翳，筆錢限期本月12日交出，否則保險公司可能會循民事追討。八方聽聞其戰友近日幫佢籌旗，蘇兆康話擔心咁短時間未必籌到好多錢，想幫佢可接觸「青台」，「我份工好忙，冇時間搵人幫手籌錢，今次都好麻煩」。