前日新加坡報章報道，現代美容（919）前主席曾裕涉嫌協助案發時同現代美容有關嘅4家新加坡公司逃稅，所以告曾裕，要佢去新加坡出庭。曾裕上個月已因健康理由，辭咗現代美容嘅職務，仲點去新加坡出庭。雖然人冇去星洲，但佢噚日就整咗份聲明。
曾裕一開始就呻新加坡稅局玩針對，話嗰4家公司開咗10年，有3個董事，偏偏要檢控佢。
華華睇完成篇聲明，認為最關鍵係究竟盤數可唔可以用「實報實銷準則」（accrualbasis）。曾裕話美容行業一直都係賣套票，預先收咗個客嘅錢，但唔會入賬住，等個客用咗啲服務先入，實報實銷。不過，新加坡稅局用「現金方式」（cashbasis），收咗錢就要入賬。

本來去外地做生意，唔可以話你做開咁，就要人哋就你，但曾裕話，新加坡稅務署只係追佢98至01年嘅稅，01年新加坡稅務署又同意佢用實報實銷，冇話佢逃稅。曾裕仲呼籲新加坡同業，主動同稅務署溝通美容業嘅特性。
華華唔係新加坡人，又唔識當地法律，好難知曾裕嘅理據係咪成立，但可以講，曾裕今年都算流年不利。