萬人迷碧咸今日一早就去到九龍灣同長沙灣，然後再落中環海濱，出席友邦香港財務策劃顧問MDRT大會誓師大會，碧咸係以全球大使身份出席，準時到場，同大家chit chat咗23分鐘左右先走。

其實大家都想像到，咸爺一現身，一定全場尖叫，紛紛湧到台前selfie。

咸爺話呢，其實過去呢廿年都嚟過香港好多次，每次嚟都好開心。講到健康之道，咸爺話最緊要照顧好自己同家人健康先係最重要，又猛話好榮幸可以參加今日呢個活動、好有意義咁啦。「我平時做運動之餘都要湊小朋友同埋放狗，我好enjoy 㗎。」

咸爺仲分享點樣去做一個leader，佢話父母都係佢嘅模範：「由細到大都跟住屋企人嘅意思去做，同埋咁多年我參加唔同嘅球會，都遇到好嘅領隊同隊長，同埋遇到嘅球員都好好。」

「父母都係好好嘅人，努力工作。天份係好重要，令一個人嘅成功，但背後努力都好重要。」佢本人亦以身作則，離開球壇後致力從商，做好自己的工作，希望能成為子女榜樣。

之後就問到咸爺鍾意香港嘅美食，佢指好難揀，因為佢係一個好鐘意食嘢嘅人，世界各地嘅嘢佢都好鐘意食，好似英國菜咁，又大讚北京嘅烤鴨同餃子都好好食，所以揀唔到香港鍾意食咩，仲講咗句鍾意香港所有嘅嘢，全場即時起哄。