噚晚好多人都開演唱會，香港有楊千嬅，台灣有鄭中基（咦…），桃園棒球場其實仲有五月天。

五月天「人生無限公司」巡迴演唱會自3月18日高雄起跑，走遍全球32個城市，噚晚重返故鄉台灣，喺桃園棒球場連續三周共唱11場。噚晚頭場入場率逾二萬人。

返番嚟主場，口抹遮攔嘅五子，係咁爆seed。當唱到《戀愛ING》嘅時候，五迷照慣例係會高喊「L！O！V！E！」，但阿信覺得fans唔夠熱情，佢好鬼正咁話：「看過一篇報道，台灣有人口老化問題，今天感覺到真的有人口老化問題，因為聽你們的聲音像80歲，舉起的手像80歲！」馬上全場鬼殺咁嘈尖叫震破耳膜。

咁呢……其實好奇怪嘅，有啲人睇演唱會又好，舞台劇又好，入場睇戲都好，總係手機不離手。瑪莎都曾經問過：「你是來看演唱會？還是來拍演唱會？」噚晚又有人忍唔到手，結果唱到《好好》前，阿信見到搖滾區有fans喺度篤手機，即忍唔住開咪：「滑臉書的，螢幕調暗一點。」全場大笑。

噚晚五月天繼續發揮佢哋嘅幽默感，亦不乏黃色笑話，例如：
1.阿信要瑪莎揀一位觀眾點歌，瑪莎搶白：「這麼暗是要怎麼挑？」阿信回敬番佢：「你不是都在暗暗的時候挑人？」之後瑪莎揀咗個，，問：「你是男生吧？」阿信即搭嘴：「你褲子拉起來檢查一下……檢查身分證！」

2.揀完歌迷，要遞咪，阿信就話：「我們的麥克風給他，看他要點甚麼歌。」怪獸即說：「我們五支對著他。」瑪莎馬上話：「五支甚麼。」怪獸再話：「五支麥克風啦。」最後阿信忍唔住向台下一位抱住小朋友嚟睇騷嘅媽媽級fans話：「我們講話的時候，請把小孩耳朵摀一下，我們希望有自在的談話環境。」

更多娛聞，喺晒《娛果》
http://fb.com/appledailyent