DaDa陳靜今早再於微博解釋退出因由,即使伯樂杜汶澤已開到聲話: 「世上沒有毫無壓力的工作,只有自我決定的心情。」 又謂: 「我保留你退出娛樂的意願,倘若你回心轉意,我年尾部戲女主角依然是你。」
至於一手打造DaDa成為金像獎最佳女配角嘅彭浩翔都話:「鏡花水月,何須介懷?肉身難得,不如笑罵由人,只圖一時快意。祝福。」似是開解,又似是挽留,但仍改變不了DaDa離開的決心。
睇番DaDa今早喺微博親解退出幕前原因,都係話因為有情緒病及心理狀況出問題,故「醫生建議我停止所有手頭上有關幕前的工作」,但DaDa唔係話完全退出,只係話「醫生建議」;而且係「停止」,換言之隨時狀態好轉,也可以「重新啟動」。就正如DaDa喺噚晚寫嘅第一篇退出宣言所講,係「要退出幕前演員工作,回到原來的生活」,言下之意是退出影壇,而不是娛樂圈。留一線生路「走盞」,誠屬明智之舉。而且退出幕前,亦可以轉職擔任幕後,或者拍廣告平面照,仍可保住人氣,壓力亦唔會咁大。
另一「退出」玄機,就要睇埋今日貼嗰篇微博,DaDa寫道:「現在的我只想做個簡單的人:打份普通的工,陪伴我的家人,進修增值自己,有個愛我又只屬於我的男人,着衫隨便但不用暴露。」家庭喺DaDa心目中一直佔重要位置,之前喺訪問中,佢都話過想陪家人多啲,故提出此「退出」理據亦不足為奇,亦不排除隨時可歸隊。
正如陳冠希當年開記招,都係話「IwillbeawayfromHongKongentertainmentindefinitely(我會無限期離開香港娛樂圈)。」唔係永遠退出。爆炸糖,你覺得好番啲就返嚟啦!