季陶不見了，變咗花生友；因乜解究？唔通季陶另覓高就？嗱，季陶粉絲毋須「恐慌」係白色恐怖。是咁的。季陶今日起搬至政治版，周一至五繼續同大家拆解政圈時局同秘聞，原有八方版嘅地盤，就交畀花生友笑盡政圈熱話，大家唔使擔心新仔上場會有三把火，搞到大家惶惶不可終日喎，花生友名副其實食住花生等睇戲，小二，來一客花生！
根據最新花生指數，排頭幾位包括學聯秘書長周永康到底禍從口出、抑或唔覺意講咗心底話？事緣佢日前接受有線電視訪問時話喎，11月30日嘅升級行動係「畀一啲期望升級為主嘅人見到，呢種行動未如理想」，點知訪問出街冇耐就俾各界狂轟，網上花生友仲笑笑口話，怪唔得學聯嗰日齋出口唔出腳啦！群情洶湧，搞到周永康都要急急道歉話，唔係咁嘅意思囉。