陳柏宇今日喺商台宣傳新歌《別來無恙》，佢話啱啱同女友符曉薇，自己媽咪，女友媽咪四個人一齊去意大利旅行，放完假返嚟就開始宣傳，柏宇話此行係慶祝埋佢生日，所以女友都有份出錢請佢去，佢話呢個組合之前都去過拉斯維加斯旅行，一早見晒家長，佢又話今次去到當地都有瘋狂購物，買得好開心。

問佢係咪計劃左2017年結婚？柏宇直認係，依家都睇緊場地，佢仲話女友好抵錫，話唔使佢買求婚戒指，柏宇話:「因為女友覺得將來都係帶結婚戒指，求婚戒指都係收埋，唔想我嘥一筆錢，因為依家鑽石戒指要成6至8萬蚊。」柏宇話結婚係一生人一次，會應使則使，啲錢用咗又唔會令你破產，都會搞一個自己滿意嘅婚禮。佢又話會準備一個浪漫嘅求婚。