做騎師最怕嘅就係停賽或受傷，一但遇到呢兩種情況，就算強如潘頓，流失座騎亦在所難免，更何況其他二三線騎師？

記得5月11日賽事，前華將一哥梁家俊養傷關係，未能上陣。結果由他跑開並有好表現、姚本輝馬房的「鑽得勁」，當日易配家俊仔的老友蔡明紹，在二班直路賽擊敗勁旅「新強勇駿」爆冷勝出，人馬表現可謂十分出色。

好喇，「鑽得勁」嚟緊本周三（26日）將會再出，角逐谷中二班1000米，如今梁家俊已龍精虎猛準備就緒，過去他為「鑽得勁」攞過2冠2亞佳績，有功亦有勞，咁今次家俊仔能否重奪帥印呢？

答案係no嘅，據知幕後已打算將「鑽得勁」續配蔡明紹爭連捷。換言之，家俊仔這匹前私家馬，已一去冇回頭！

「鑽得勁」唔止擅長直路賽，今戰所跑的谷草1000米亦三戰兩勝，這匹五歲馬今季大熟大勇，看來仍在進步中，大有機會取得本身季內第四Win，可惜已唔關梁家俊事，他只能望馬輕嘆了！

-----------------------------
7月4日起 《蘋果動新聞》只限升級壹會員閱覽
繼續撐蘋果！
https://hk.adai.ly/e/iIRREmuwDX