環保L到中環食飯，行經左丁山寫字樓，順便上嚟坐吓。是日適逢會考放榜，唔少朋友打電話嚟問子女升學意見，當足左丁山係升學專家。今年會考成績好似係香港社會嘅收入分布反映，就係貧富懸殊。考到七A至十A嘅學生人數多咗，考到0分嘅學生亦增加不少。兩極化趨勢甚為明顯。
呢個世界，最緊要睇得開，左丁山有兩個近親，一個考到三B五C一D，開心之至；另一個考到啱啱中英文五科合格，仲有兩個良㖭，正式中學會考畢業，亦非常高興，唔羨慕人哋考九A十A，此乃正確態度，求學靠自己，兩年後佢兩位考高考，邊個敢批佢哋唔夠啲四A五A學生考（假設六A及以上嘅尖子全都唔讀中七，入晒大學）。

環保L出身英皇書院，當年成績唔曳，不過佢成日話，人老咗就不能以成績論成敗，人生際遇誰可知，淨係睇劉山青（英皇、港大）與梁振英（英皇、工專）呢兩位同班同學就知啦。環保L位千金自聖保羅男女畢業，最近回港參加聖保羅男女九十周年校慶，特登走到機場嘅亞洲博覽館參加慶祝晚會。好多co-ed校友上台表演，其中一位上台唱Istartedajoke，好似BeeGees，然後唱羅文名曲，甚有水準，環保L打聽之下，呢位仁兄叫做吳嵩。環保L話：「co-ed啲校友真係幾醒，玩得唱得，可能因佢哋嘅家庭背景有關，我哋啲英皇校友，以前官校學生以清貧子弟為主，最叻就係吹口琴，因為口琴係最平嘅樂器，唔似得co-ed班人彈鋼琴，拉小提琴，吹笛，樣樣識。」環保L舉咗幾個英皇樣辦，都係死讀死做嘅成功例子，如梁振英、馮紹波、陳永陸，以及林超英。左丁山諗吓，又係噃，聖保羅男女啲校友，譬如周梁淑怡、鄭慕智、李國章、李澤鉅、李澤楷、陳啓宗等等，個人風格形象與英皇仔好唔同。