鄉議局本月七號舉辦咗就職禮暨聯歡晚宴，請咗一大班達官貴人做嘉賓，身為主席嘅劉業強，其中一個責任係為呢個活動撲水，睇番最終結果，發現強仔吸水力特強。

劉業強連同兩位副主席張學明同林偉強，最終籌到224.8萬，單計劉業強個人就籌到194.8萬，都算幾叻仔咁啦。之但係呢，呢個只係喺鄉議局大樓舉行嘅就職禮，竟然都洗咗239幾萬？而總收入就只得225萬多啲，換言之仲差14萬幾？哎，點解咁大開支㗎呢？

鄉議局今日亦閉門傾過套丁案。劉業強會後強調鄉議局會保障新界原居民權益、高度關注呢件事，仲話已經去信發展局希望雙方重開會談，傾下點樣完善丁屋政策。睇嚟撲水事小，處理好呢次套丁案引伸嘅問題，先係劉業強登基後一大考驗。