中信股份（267）10連陰後，噚日見番支陽燭，但9 RSI都仲喺8.4超賣區，現價又比上年引入各路大孖沙嘅成本價潛水，家陣PB亦比平均值平咗半，中信再質兜底。
中信上年頭，引入由泰國頂級財團卜蜂，同日本五大商企伊藤忠合組嘅正大光明。正大光明連舊股認購同優先股兌換，揸中信58.2億股，總成本講緊高達800億元，或每股13.8元，中信現價11.86元，潛水14%。而正大光明喺中信呢撼投資，賬面數係少咗過百億元！

獲母企注多元業務

再喺上年7月，中信又引資雅戈爾（滬：600177）最大單一嗰板8.6億股，每股成本價13.95元，中信現價又係潛水。而雅戈爾買中信，總花費148億元，等於雅戈爾上年6月尾股東權益223億港元的66%，唔惹少。
中信經前年重組，獲阿媽注入多元瓣數，集團家陣總資產值高達6.5萬億元，而中信對口又係國務院，實力超晒班。上邊幾位大孖沙，煲重中信，唔係無啦啦。
又中信呢轉跟足個市跌，得番0.65倍PB，今、明兩年預估PB得0.59倍同0.54倍，比起上市以嚟平均1.2倍，平咗55%。專業評估中信就快派2015年成績單，EPS 2.11元，今年就算計埋倒退，EPS 1.92元，預測6倍PE，亦比上市以嚟平均值11.6倍平近半。
中信再質，吼實2014年10月以嚟下行通道底10.8元，到時有底背馳，仲confirm，兜底首站先睇上邊大孖沙入股價13.95元，中信講緊要升30%，今年預估PB，都係得0.7倍。

錢雋
細價股專家
本欄逢周一、三、五刊出