冇啦,冇啦。依家個個「金融才俊」都有另一半(例子:羅章冠);女神級既就被私有化,好似今日到銅鑼灣出席時裝品牌JuicyCouture春夏展活動嘅陳妍希同陳瀅,兩個分別沐浴愛河之中,sosweet。
陳瀅同何䣭亨打得火熱,經常被拍到甜蜜出雙入對,四太又開綠燈,感情穩定,難怪陳瀅春風滿面。
陳瀅話剛放完假由溫哥華返港,咁有冇帶男友同行?佢話:「遲啲先,好耐冇返屋企,想今次同屋企人有私人時間。屋企人有睇新聞,都知我拍拖消息,我都有提少少。」
家人滿意男友嗎?陳瀅話:「未知,始終未見過,睇遲啲兩人有時間先,返去要飛十幾個鐘,等大家穩定啲先。」問到陳瀅是否已見過男友家長,佢封嘴話:「男朋友屋企我唔畀意見。」
四太開綠燈批准你哋拍拖喎……陳瀅話:「你哋講啫,問返男友啦。」
䣭亨同陳瀅即將度過首個情人節,陳瀅諗緊買咩禮物同安排,而新年則要到廣州搵爸爸拜年。陳瀅仲大嘆:「情人節希望開工呀,放咗三個星期假好悶。」嗯,真係好曬好曬。
情人節都唔陪男友,唔怕投訴咩?陳瀅話:「開心就日日都係情人節啦,拍拖係開心。」即係呢個男友滿分啦?陳瀅笑晒話:「觀察下先,我哋讀書時已識,識咗一段時間,幾時拍拖就唔講喇。」
䣭亨和陳瀅拍拖消息曝光後,即有指陳瀅被包養及入住四太名下物業君臨天下,陳瀅話:「我係有同人同居,係姓何叫何雁詩,同居咗一年好開心,係我哋租住物業,同男友家人無關。」
談到「包養」一詞,陳瀅話:「不實報道唔想提。」䣭亨早前都憤怒鳥為陳瀅平反,好貼心保護,陳瀅聞言即扯開話題話:「阿moon(劉佩玥)sweet啲,話畀人撬長腳,係我畀男友撬走咗我。」而報道指䣭亨曾追陳凱琳,陳瀅話應該唔係。