雖然最近油價跌到油組都話想開緊急會議，睇吓可唔可以斟掂減產默契嚟挽救油價，但中東油國荷包依然滿滿，對我哋嚟講，西征掘金仍係政治正確。
所以財經事務及庫務局局長馬時亨，將會響禮拜五再拉隊，一行30幾人出訪中東6日，推廣香港同埋睇吓有咩合作機會，行程包括沙特阿拉伯嘅利雅德，阿聯酋嘅阿布扎比同埋杜拜。
據講今次唔止推介金融，仲會叫埋基建同房地產服務業代表一齊去。咁就啱喇，人家紐約市長彭博都鬼咁緊張，叫麥肯錫整份競爭力比較報告，話紐約10年內可能失去全球金融之都嘅地位，皆因佢哋啲金融服務落後於倫敦、杜拜、東京同埋香港，咁我哋正好更加努力，踏實啲做好金融基建與推廣先係上策。

講開又講，財務匯報局新主席高靜芝噚日同華華茶敍，話美國因為實施咗個超級嚴格嘅SarbineOxleyAct法案趕客，正好為大家提供咗一個好嘅經驗，就係監管一定要有平衡，今次港府成立財務匯報局，並唔係為咗從嚴監管，而係做會計師公會以前受法律所限而做唔到嘅問題上市公司調查工作。
而候任行政總裁沈文燾話，會盡快埋班，希望年中可以開始接柯打，佢打算請10至15人，咁人工幾多先？沈總裁話，佢年薪先得200萬元，惟有動之以情，希望個局可以吸引到啲願意對社會有承擔嘅人才，各位有興趣又有能力嘅高人，不妨毛遂自薦。
[email protected]