李八方online︱689死咬前下屬楊潤雄唔放：為官避事平生恥 大言不慚 嚴重失職
蘋果日報 2020/09/17 16:01
李八方ONLINE梁振英楊潤雄
近月協助中共加強整肅香港教育界，似大陸幹部多過港府官員嘅教育局局長楊潤雄，噚日透過教育局發言人不點名反駁前特首梁振英嘅批評，強調自己從來冇抱住「唔好搞大佢」態度，指689批評時需要基於事實。689秉持佢嘅政壇痴漢作風，今早再次在Facebook出po，死咬住楊潤雄唔放。
教育局發言人噚日話，對於嚴肅處理失德教師嘅學校、尤其係涉事教師已經離職嘅個案，公佈有關學校名稱有欠公允。689噚日睇到後顯然好不滿，今日在Facebook出po話醫生被投訴專業失德，研訊後懲罰不論輕重，都會公開醫生受罰決定，但教師現時即使被投訴，教育局完成調查並作懲罰後，都唔公開教師或者學校名稱，對家長不公：「把廣大家長蒙在鼓裏，對家長公允不公允？令廣大家長不斷懷疑自己子女就讀的學校有沒有這樣的教師，對廣大正當教師公允不公允？對沒有出事的學校公允不公允？」
689狠批楊潤雄日前接受訪問時「仍然大言不慚」，質疑楊潤雄話教育局對做出普遍社會不可接受的行為嘅老師會「採取行動」嘅說法係唔夠力，「甚麼行動？發一紙公文就算行動？這是嚴重失職」。689更批評曾經係佢下屬嘅下屬楊潤雄，係「為官避事平生恥」典型。政治就係咁玄，楊潤雄捱得過689年代，以為跟林鄭就冇事，點知反過來被689狙擊。不過當林鄭都形容自己唔識政治、只懂管治，楊潤雄呢啲都係咎由自取。
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！