日本女團AKB48舊將秋元才加，上年開始單飛發展，當離隊後即有片商睇中，為話題電影《奴隸區》擔正做女主角，當佢忙於日本同台灣嘅宣傳工作後，今日就到香港展開兩日一夜嘅緊密行程。

秋元才加今日中午抵埗後，立即到西九龍中心舉行公開活動，吸引大約200名粉絲支持，佢特登練定廣東話自我介紹，當然贏得熱烈掌聲啦！

之後，大會就安排fans上台玩遊戲，秋元仲親手頒贈禮物畀幸運兒，鬼咁親民。

秋元都先後幾次嚟到香港開工，佢話每次都來去匆匆，今次都唔例外，所以都冇乜時間周圍遊覽，佢就希望等陣可以食吓粥同埋蛋撻等港式美食。

講到喺《奴隸區》入面有虐待鏡頭，秋元就話被虐場面都唔難演，最難反而係叫佢扮煲煙，真係考起一向唔識食煙嘅佢喎！

問到之後想演咩角色？秋元就話想挑戰揸槍角色，就算女警抑或劫匪都冇所謂。