由美國名導米高曼（MichaelMann）執導，講網絡黑客嘅新片《Cyber》，遲啲將會嚟到香港取景。

劇組噚日已經喺洛杉磯開工，有外國狗仔隊就影到湯唯同男主角「雷神」基斯咸士禾夫（ChrisHemsworth）喺洛城一個拉丁人社區現身，兩個人闖入民居似想開房，佢哋又齊齊戴上黑超，打扮同行動一致甚有情侶相，過馬路時基斯仲用右手輕扶拍檔左臂，行起嚟真係好有拖友感覺，而戲入面兩人確有感情線。

之後兩個人登上一棟兩層高樓房，基斯同一名中女交談，似係想租間房俾湯唯落腳，而湯唯就一直從旁聆聽。不過，基斯喺停機之後同湯唯完全冇任何交流，連閒談幾句都冇，反而同嗰位中女演員同其他工作人員有講有笑，可能避免因為太接近湯唯傳緋聞而激嬲為佢誕下寶貝女嘅演員老婆ElsaPataky。