亞洲電視積弱多年，有紅頂商人查家入股，搵埋無綫精英加盟，近年似乎略有起色，但始終擺脫唔到二奶命，八方收到可靠消息，亞視近日傳出鬧鬼驚魂，大埔工業邨新總部可能有「污糟嘢」，所以諸事不順，高層為求心安理得，唔怕棹忌喺新正頭大年初十搞咗場灑淨法事，希望工作順利，萬事大吉。
亞視舊年8月由廣播道搬入大埔，有員工向八方爆料，指入伙大半年至今，公司內最少有三個同事過身，冇事嘅都好多病痛，甚至連家人都行衰運，舊年尾攝影師李東杰又唔好彩喺台灣採訪時出事重傷，公司上下遂竊竊私語懷疑新總部風水唔好，令大家頭頭碰着黑。

新入伙冇擇吉時拜神

更詭秘嘅，係早前傳出有人撞鬼，知情人士話，盛傳有個返夜更製作部男職員，有晚喺二樓辦公室做嘢時覺得陰風陣陣，怪風吹到房門「嘭嘭」聲，佢走埋去想閂埋道門，點知一擰轉頭，竟然見到有個疑似女鬼物體企喺身邊，嚇到佢飛起。至於個女鬼有冇搞佢，之後點收科，呢位人士話唔清楚，只知有人向上司要求唔返夜更，呢個「夜鬼撞夜鬼」傳聞則越傳越勁，連《我和殭屍有個約會》入面個法力高強現代天師馬小玲，或者火辣辣嘅數碼Angel都鎮唔住。
據聞亞視高層初時對撞鬼傳聞不以為然，但後來有人記起舊年搬遷入伙時，好似冇正式擇個吉時就拜神，諗諗吓覺得寧可信其有，都係做番啲嘢安樂啲。由於此事關乎員工身心健康，所以委派人事部處理，有人搵來得道高僧開壇。亞視發言人證實上星期六大年初十舉行咗個「祈福大會」，做咗場灑淨法事。
八方聽聞呢場法事好大陣仗，朝九晚四搞足一日，仲喺二樓大堂擺咗兩個大香爐畀人上香，其中一個指明係幫李東杰祈福，祝佢早日康復。當日有份上香者透露，呢場法事搞得幾低調，大老闆查生冇到，亦唔多覺眼有藝人蒲頭，但各部門頭頭幾乎到齊，大家三個一排誠心上香，之後高僧每人畀一封僅得手指甲咁大嘅利是，入面有一個一毫子，據聞係畀大家傍身，有人放喺公司擋煞，亦有人隨身攜帶以備不時之需，至於鎮唔鎮得住啲「污糟嘢」就唔知嘞。