37歲嘅吳尊，曾以台灣組合飛輪海而紅透中港台。外形白滑靚仔嘅佢，成日俾人話同鍾嘉欣撞樣。吳尊喺汶萊長大，甫出道即成為偶像劇嘅男主角，不過佢近日接受《新浪娛樂》訪問時，就話初初出道，由於對呢行冇乜信心，所以簽嘅合约係隨時可以解約嘅，當時佢仲同經理人公司講明：「假如我隨時解約，你們都不能告我！」

06年吳尊喺偶像劇《東方茱麗葉》中首度擔任男主角，戲份好重。吳尊透露自己當時壓力幾近爆煲，喺拍攝過程頻頻出錯，仲曾經俾導演當着超過200個臨記面前狂鬧：「滾回汶萊啊！你會不會走位啊？」搞到吳尊爆喊仲偷偷打電話同老竇訴苦。吳尊話：「因為自己一點經驗都沒有，但導演不把我當成新的演員，他把我當成是男主角，要有男主角的那種標準。」雖然難捱，不過吳尊擔心辭演會對劇組帶嚟麻煩，結果咬實牙關拍到尾，吳尊仲話最後同呢套劇嘅導演成為好友。

吳尊喺訪問中，亦直言自己性格怕醜內向，佢喺劇中有一場抱住林依晨嘅戲，拍嗰陣吳尊面紅兼冒汗，導演睇唔過眼，要佢直接坐喺林依晨大髀上10分鐘，仲要林依晨攬番佢轉頭，吳尊諗起呢段陳年經歷依然覺得尷尬，但佢都感謝林依晨畀佢好多建議，覺得自己好幸運。