59歲毛舜筠年紀步向黃昏，但生命卻越活越精采，去年成為了藍帶廚師，今年憑《黃金花》奪金像影后，上星期榮升老闆娘在灣仔開設曲奇餅店，這間餅店是她和美指老公區丁平的結晶。

「我其實一直冇諗過做生意，只係將學到嘅嘢同屋企人分享，除咗食飯之外，發覺屋企成日有曲奇餅，我老公夜晚唔瞓嘅，好似一隻老鼠仔，周圍摷零食，佢係一個美術指導，好睇個盒靚唔靚，好多時買返嚟個盒好靚，但食物麻麻哋。呢個過程體驗到外國品牌特別好食，點解呢？我就去研究，發覺佢哋好肯用足料同靚料，所以我去研製點整，一步一步設計到一家人都鍾意食嘅曲奇。」

不過，用靚料和足料，成本就很高，毛姐說：「我喺屋企試過，想將成本減低啲，例如用澳洲牛油，唔用法國牛油，唔好買咁靚nuts，但過唔到我嗰關呀，最後都係唔得，一係唔做，一係做到最好。尤其藍帶之後，大家都知我係點嘅人，變咗冇得退而求其次，哪怕佢成本貴好多，我都返唔到轉頭，呢個係我心願。」

當初毛姐到法國「藍帶國際學院」修讀廚藝，過程超辛苦：「如果話畀大家知去法國讀廚藝，哎呀，好浪漫呀，好優雅呀！當初朋友問我有冇諗過去法國藍帶學煮餸？我話好喎，朋友最衰講咗另外一句：『其實毛姐你唔使學，教都得！』呢句慘啦，我以為自己好勁，點不知，去到發覺係廚師訓練學校，每一個都準備做廚師，所以非常之嚴格。」

在香港煮得一桌撚手小菜的毛姐，在法國卻由零開始：「我成日講，香港嘅太太或女士最幸福，因為我哋請到菲律賓姐姐幫手做準備做清潔，我哋行埋去兜兩兜就食得，去街市買魚，通常劏埋畀你，仲可以問蒸幾多分鐘，返去切啲葱同薑就搞掂，你買雞，佢又係劏晒畀你，又係問佢蒸幾多分鐘有得食；但我喺法國學藍帶嘅過程係由零開始，條魚要刮鱗、劏開攞晒內臟、起皮起骨，雞又要燒毛、綁番去焗，咁繁複過程裏面，每分鐘都要乾淨，哪怕一把用過或未用過嘅刀，你擺喺砧板上面，佢都會喝你要你移走，佢要見到嘅地方都乾淨，明係丟垃圾嘅垃圾筒，佢都要見到冇垃圾，你諗吓難度幾高呢，即係你做緊嘅時候丟，OK佢明白，但下一個步驟之前，你一定要清理晒先再做。」

除了學烹飪，還要讀理論，加上有語言障礙，導師用法文教，雖然有英文繙譯，但同時間雙語進行好混亂，毛姐說：「其實，如果讀之前了解咗係咁，我一定唔會去讀，太辛苦，但種種原因，結果三個課程讀晒，再回頭望一望，係人生好大考驗，但如果問我呢個年紀再嚟過，我一定唔制，平時我係一個好好記性嘅人，無奈年紀大咗真係差咗，我又要做到最好喎，對自己要求又高，所以好辛苦，畢業時我瘦咗10磅。因為每樣好認真，唔知你哋有冇聽過九型人格，同我相處過嘅人，都話我係1仔，完美主義，所以我好辛苦。」

撰文：余燕儀
攝影：沈健程
攝錄：廖達燊、葉君海
場地：Mustard Seed Co-working space

精選娛聞，喺晒《娛果》
http://fb.com/appledailyent