當年今日
關於我們

摺壓鍊洗樣樣得布製概念手機

蘋果日報 2002/01/14 00:00


摺得、壓得、鍊得又洗得,邊部手機咁了得?之唔係用布做嘅手機。一間專門研製柔軟物料嘅英國公司ElekSen,設計咗幾部用布做嘅手機雛形,賣點係夠輕、耐用兼且可以任㩒任壓。雖則呢批布手機只屬雛形尚未面世,但家陣嘅手機一個唔小心會刮花甚至壓爛,用布包裝絕對係一個新出路。
記者:招佩珊
雙面操控兼換面
一睇「SoftPhone」呢個名,就知道可以任鍊任壓嘅機身係最大賣點。不過,同其他布手機最唔同嘅地方,就係佢響屏幕位置嘅機背位,有一個輕觸式操控盤。當你面對住個芒,用手指輕輕篤住機背操控盤,屏幕上就會有個游標出現,游標會跟住手指嘅移動而四圍郁,換言之機面同機底都可以操控手機嘅功能項目。
免提會議布上傳音
叫得做「ConferenceTelephone」(會議電話),就係Sell免提功能畀成班人齊齊傾電話。而佢身上可以透聲嘅布料,令到唔使依賴電線就可以傳音。另外,呢部電話底部亦裝咗MP3嘅組件,傾電話時可以將內容以MP3格式錄低,就算唔用部電話都可以駁MP3機聽番。不過用電話前就要先拆咗個透明保護蓋,而底部就有個作回音用嘅金屬蓋,出到嚟嘅聲就一定唔會「坼」。
手表電話玩Fashion
呢部「SoftWristPhone」特別在於表帶同表肉都係用布做,表帶重可以拆出換上其他花款,而且可以捲曲或拉直,手臂幼嘅用家只要圍多幾個圈就得。不過呢隻手表電話喺打出時就要除表帶,拉直表帶上的數字鍵再㩒冧巴先得。次次打電話都要除表,似乎唔係咁方便。
任屈任拗變摺機
之前見嗰3部布手機都只係壓得鍊得,而呢部外形似粒豆嘅牛仔布Look手機,就直頭可以摺得埋,唔使好似一般摺機咁要有個鉸位,當佢係直身機又得,但只要屈一屈就變摺機。
港人評語:唔襟撞!
架勢出展紐約博物館
去年4月,呢個系列布產品嘅雛形,就曾於美國紐約博物館(NewYorkMuseumofModernArt)展出,呢間係當地一間專門擺放及展出現代藝術品嘅博物館,所以咪當呢批布手機係小兒科!