丁可欣（火雞姐）噚晚喺銅鑼灣舉行新歌《So What》分享會，除咗獻唱新歌，佢仲揀咗自己嘅《撫心自問》同連詩雅嘅《到此為止》。記者笑言揀《到此為止》好似唔係咁吉利？丁可欣話：「其實係因為我自己好鍾意呢首歌，而且我準備緊一首新嘅情歌，個感覺都有啲相似，所以我跟老師學唱歌嘅時候，都有唱呢首歌。」

佢話新嘅情歌預計7、8月推出，首歌會由自己親自填詞：「其實都填咗幾個version揀緊，希望可以揀個最好嘅版本畀大家聽。做完呢首情歌之後，就會造跳舞歌，可能自己跳開舞，硬係覺得自己跳得唔順眼，同埋邊唱邊跳其實都有難度。」

佢又透露首情歌係記錄之前嘅戀情：「都係想記錄返自己嘅情緒，我哋都有七年時間，不過係和平分手。大家都有共識分開更加好，其實我哋O依家都仲係互相支持，都係對方好重要嘅人。」咁新嗰首跳舞歌，會唔會自己做埋排舞師？佢就笑言會自己編排舞蹈，因為可以慳啲錢：「因為O依家正自己拎錢出嚟做音樂，樣樣嘢都親力親為，雖然係好辛苦，但係好值得。」佢仲話最想同狄易達合作，因為以前有幫對方做dancer，無論係一齊跳舞定係合唱都好想。

精選娛聞，喺晒《娛果》
http://fb.com/appledailyent