由獲法庭委任做亞視經理人尋找白武士,到成為亞視臨時清盤人,黎嘉恩與亞視特別有緣。他在訪問中多番強調於今次事件中的角色是「中性」,並不覺得亞視「執咗佢會好啲」。
黎嘉恩指個人而言亦不想亞視提早「熄機」,他表示:「我𠵱家冇乜機會睇電視,但你問我如果冇咗(亞視)係咪可惜?我覺得會,呢個係真嘅。」黎嘉恩直言,小時候愛收看亞視的節目,除了《幪面超人》之外,還有其他經典武俠劇集,「《浣花洗劍錄》我都鍾意睇,我仲記得首歌點唱」。資料顯示,《浣花洗劍錄》為台灣武俠小說作家古龍作品,1978年由麗的電視(亞視前身)將之改編,蕭笙監製,張國榮、文雪兒、王書麒、黎小田等主演,劇集播出後成一時熱話。
黎嘉恩又表示,不是「純粹掛住亞視咁簡單」,而是亞視能給予他「一齊成長的回憶」。雖然他承認收看無綫的時間多過亞視,「但亞視有啲嘢好突出,無綫整體平均……但如果你問我無綫,反而我相對嚟講冇記得咁多」。
■記者石永樂