【爆相爆片】年中黐澳門中佬 32歲戴夢夢斷正翻撻太極Ricky
翻撻戴夢夢朱翰博
32歲戴夢夢兩年前戀上51歲已婚太極鼓手朱翰博(Ricky),二人愛得癡纏。但到6月中,夢夢被爆同Ricky兩年情玩完,跟住仲俾人影到同一個年約40歲嘅中佬,去咗澳門賭場玩兩手,全程又攬腰又黐得好埋,好似熱戀中嘅情侶咁。(新聞連結: http://bit.ly/2yrYw8d )
事後中佬俾人起底,原來係任職五星級酒店嘅首席品酒師Sam Chong,有指Sam喺行內好出名,而夢夢亦隨即承認同Ricky已經分咗手,做番好朋友。至於同中佬遊澳門,夢夢只係話:「其實大家仲了解中,佢係圈外人,唔想講太多!」(新聞連結: http://bit.ly/2s13wkK )
不過世事嘅嘢,尤其係愛情,你又點估得到?呢頭俾人影完同中佬打得火熱嘅戴夢夢,日前(17日)晚上約8點,就俾讀者張小姐《蘋果》「爆相爆片」,影到佢同「已分手」嘅Ricky,喺銅鑼灣一間西餐廳撐枱腳。張小姐表示:「佢哋入嚟嗰陣,女嘅就戴住口罩,好避忌咁,坐低先除口罩,然後佢就拎住個餐牌,左揀右揀,冇同Ricky商量就落單。中途我同家姐望咗佢幾眼,佢就睥咗我哋一眼,然後就用英文細細聲講句『望咩呀,未見過明星呀』。到啲嘢食嚟咗之後,佢食咗幾啖,就彈人哋啲嘢食難食,反而個男嘅就一直冇出聲。」張小姐話佢哋喺餐廳大約食咗兩個鐘先走,由男方埋單,走嗰陣,戴夢夢再次戴上口罩。
同時,張小姐話留意到佢哋當晚肢體動作同神態,例如夢夢食食吓,就試過摸一摸男方塊面,都唔似分咗手嘅情侶。睇嚟夢夢同Ricky翻撻成功咁喎!
讀者張小姐指夢夢同Ricky嘅言行,唔似
分咗手。(讀者提供圖片)
夢夢同相差近20年嘅Ricky拍拖兩年,到今年6月宣佈分手。(資料圖片)
有指夢夢同Ricky之前撻着,男方仍未同太太Anne離婚。(資料圖片)
二人公開戀情後,Ricky就試過公開攬實林建名。(資料圖片)