黎瑞恩（小恩子）今日喺新城宣傳發燒碟，首批5千張嘅唱片已賣斷，準備要加印，小恩子話：「14年冇出碟，多謝大家支持，今次CD喺德國做，遲啲黑膠碟就喺日本做，賣到咁多，梗係開心。」

問到囡囡有冇買碟支持？小恩子笑住咁話：「佢第一個去買，用自己零用錢，我叫唔使買，但係佢話要自己買嚟支持，我好冧呀！佢仲將我嘅poster貼喺房，大過晒佢偶像嗰啲，佢鍾意防彈少年團。」小恩子係咪好滿足？佢話：「應該喇！大佬，我靚過晒佢哋。」

小恩子仲透露兩個仔女都好鍾意唱歌，問到會唔會反對佢哋做歌手？小恩子話：「會講利與弊畀佢哋聽，唔可以控制，只要唔係傷天害理，唔犯法就得，年輕人要多方面嘗試。我都開心，我呢份工好精彩。」小恩子仲透露今年將會舉行HiFi show同籌備年尾舉行嘅演唱會。