首次在港開騷既李玟（CoCo），噚晚同著名音樂人趙增熹，喺會展新翼舉行《李玟x趙增熹歡樂今宵慈善演唱會》，CoCo全晚都以性感舞衣表演，今次佢搵咗超級偶像譚詠麟（阿倫）同葉蒨文做嘉賓。

阿倫喺台上話本來會去巴西睇世界盃，不過因為CoCo開騷，所以取消行程，見證佢喺香港既第一個騷。

CoCo仲喺個大螢幕，放咗一張收藏咗好多年嘅阿倫經典照，阿倫睇見到忍唔住話：「呢張相應該係我去台灣發展頭一年。」阿倫話大家都識咗好多年，但係一直都冇合照，跟住阿倫攞咗個自拍神器出嚟，同CoCo、趙增熹喺台上齊齊自拍！

之後CoCo同葉蒨文(莎莉)合唱，莎莉好搞笑話，後悔冇揀到自己啲歌嚟合唱，希望下次有機會再合唱！

CoCo喺台上唱《明星》嗰陣，喺螢幕度播咗一段文字心聲，從來未見過爸爸既CoCo，媽咪同佢解釋，天上最大嗰粒星星就係妳爸爸，所以每次望住啲星星，就會當係同爸爸傾訴，結果CoCo喺唱歌嗰陣感觸落淚！

CoCo兩個姐姐亦都有喺台上齊齊合唱，而喺演唱會尾聲，CoCo唱咗一首英文歌俾佢老公，佢大晒幸福自己搵到一生中最愛，希望大家都搵到自己既愛人。