如果要為我揸一間公司嘅時間定下一個期限，我希望係一個世紀……響呢個炒股即日鮮的世代，係儍仔先會願意揸一間公司嘅股票揸咁耐，但咁啱，又真係仲有一個咁長情嘅人喎，呢個唔係咩蛋散，而係萬人敬仰的美國股神畢菲特！
畢菲特最近又開金口入錢落大家個袋。佢話佢嘅投資哲學其實好簡單，就係一個字——愛，但唔係私募基金只在乎曾經擁有嘅一刻激情喎，而係天長地久嘅真愛！

同高層「深情對話」

佢老人家認為，收購一間公司，一定要有心理準備揸佢揸到天荒地老，好似佢喺收購鐵路公司BurlingtonNorthernSantaFe後，就話會揸呢間公司揸足一世紀；而佢喺買入農產品供應商CTBInc.後，就直情同CTB班員工講話會揸CTB揸到海枯石爛。佢早前亦都對比亞迪（1211）作出承諾，話有生之年都唔會沽售比亞迪。
之不過愛還愛，畢老都好明白愛情係唔可以盲目嘅，尤其係用錢買返嚟嘅愛情！所以，佢收購一間公司之前，會同嗰間公司嘅管理層嚟個「深情對話」，仲會「望住佢雙眼，睇清楚佢係鍾意錢多啲，定係愛間公司多啲，雖然冇人會嫌錢腥，但我就只係會睇重愛間公司多啲嘅人……」咁又係呀，就好似拍拖或者結婚咁，之前唔起清楚對方個底，到頭來掟煲嗰陣，賠都賠死你呀！

李華華
mailto:[email protected]