報喜不報憂
同一般人唔同，運動員喺網上世界偏向post開心嘢，唔係冇心噏嘢，只不過比你知又點啫，所以你接收到嘅都係《陽光點的歌》，暴風雨有幾坎坷，佢自己先知。

加油係行貨
打氣留言嚟講，其實加油努力呢啲字眼已經去到冇乜意思嘅地步，正如朋友生日同佢講happybirthday一樣，唔係唔應該講，但係除咗多謝之外真係冇嘢好回應。真心friend的話，反而好多嘢可以搞，可以激將法，可以扮賴皮，可以做毒男，可以扮闊佬，總之就係要令運動員朋友有反應，唔講門面說話，講番啲心底話，咁先可以開心一齊開心，傷感共同傷感。

超人都係人
運動員跑得遠、游得快、射得靚嘅一舉一動，最多得到嘅反應係「好勁呀」、「好犀利呀」，之不過運動員超人咁款嘅感動時刻往往只係得眨眼咁快，其餘時間呢，其實係過緊一啲冇話你知或者唔方便話你知嘅非人生活，唔通吓吓食得清、捱得痛、曬到死、悶到暈又要話你知咩？拉勻嚟計，其實運動員嘅生活都幾難捱嘅，透過佢哋唔覺意嘅字裏行間訴苦，大家反而睇得相當治癒，心諗「普通，原來是福」。

笑人係啱嘅
運動員同運動員之間嘅關係，一係互相打氣，一係互相打擊，冇乜中間路線，咁世界確實冇完美，夢想段段關係都和諧當然係太天真，之不過可以多一個friend總好過少一個，與其妒忌在心，不如開口坦白：好憎你囉次次贏晒/點解我咁靚仔但係冇你咁好波啫/又係對住你呀陳生即是迫我轉項啫……笑笑口咁講呢啲心底裏悔氣話，講咗出嚟舒服咗，而由於你老實行出第一步，亦可能直接刺激對方放下戒心，佢真心嗰句可能係：我怕咗你就真！大家一齊放低無謂嘅猜疑。

笑自己先高
運動員一般都係自信爆棚，但與此同時佢哋又好識睇少自己，好似話準備唔夠多、練習偷咗懶、做得唔夠靚、反應唔夠快，無論攞咩成績，運動員都可以抽係自己水，踩自己兩腳，呢招高嘅地方係你踩低自己先，不但封咗其他人加多腳嘅機會，亦自然有人睇唔過眼抬番你上嚟，一上一落，又賺咗啲心心！

文:Keyman（節目主持）