二月十一日星期六上午十一點幾近十二點，正想出門去馬場，忽有電話，來電者乃披圖梁，重以為佢有必贏貼士㖭，點知佢真多事，猛叫左丁山去搵渣打銀行高層傾傾，左丁山話：「有乜好傾呀，與渣打高層唔多識噃。」披圖梁話：「呢兩日空氣非常污染，戶外運動到達危險程度，聽日星期日係渣打馬拉松舉行之日，空氣會更污染，我話一定有人入院治療，其中可能有大件事。你想辦法叫渣打宣佈取消馬拉松啦！」
唉，佢真係睇得起左丁山，如此大事，幾萬人跑馬拉松，渣打所有高層包括主席戴維斯，雲集香港，從賓架界聽講好多大人物住晒響置地文華酒店。咁嘅場面，咁嘅時刻，點可能會宣佈馬拉松取消或延期？

於是叫披圖梁唔好杞人憂天，到咗馬場聽見有乜靚馬勇馬，不妨通知聲！披圖梁就話空氣污染會影響埋馬匹，一定有馬匹流鼻血，投注唔好咁大。入到馬場，第一場就爆大冷，第二場隻「吐氣揚眉」內部出血暴斃，韋達萬成墮馬，幸好吉人天相，冇事。第七場又爆冷，睇落都係爆呔居多，練馬師自己都唔知。馬主界傳出消息，有馬可能轉馬房，睇吓會唔會？到咗星期日晚上，睇電視新聞，即刻嗌聲弊弊弊，披圖梁竟然噏中，馬拉松賽事有近五千人不適，二十二人送院，其中兩人垂危，唔通真係與污染空氣有關？
狗年自從年初二之後，左丁山至今未見過藍天白雲，日日灰霾蓋頂，我哋出入中環，呼吸有啲困難，有位朋友患傷風，喺大道中一路行，一路打噴嚏，十分辛苦。唔怪得話空氣污染，關乎香港投資環境，啲外商僱員嚟到香港，對空氣污染十分不滿，有反彈情緒，如此情況繼續下去嘅話，可能有人為咗空氣而移民，而外商僱員會抗拒來港。
環保專家廖秀冬局長做過乜嘢呢？佢對記者指責中電污染空氣，中電常務董事阮蘇少湄與環保署針鋒相對，呢排用米高峯對罵多過坐低慢慢傾，兩位女強人可唔可以開心見誠，攤開嚟講，解決彼此嘅矛盾呢？普通市民唔會相信中電係空氣污染嘅禍首，廖局長搞唔掂內地，搵代罪羔羊咋啩？