前晚劉德華雖然冇出席商台叱咤樂壇頒獎典禮，但華仔就喺噚日凌晨十二點幾接受吳君如電台節目《嘩嘩嘩！打到嚟！》嘅電話訪問，君如問華仔此時身在何處，華仔話：「我𠵱家喺屋企，我啱啱先忙完，真係去唔到（叱咤頒獎典禮）呀，𠵱家一班朋友喺我屋企玩緊，食緊甜品。」
「我愛劉德華」
噚日有周刊報道話吳君如拍完《愛君如夢》後，成日發表「我愛劉德華」宣言，搞到梅艷芳呷乾醋，重四圍話畀人知君如拍戲時批評佢。馮仁昭諗番華仔個訪問，君如講幾句嘢好似內有含意，佢特登講話華仔一月一日着住拖鞋去佢屋企，君如話：「佢（華仔）帶咗兩個批，同三杯咖啡嚟，連莫文蔚都打電話問我，你近排三句唔埋兩句就係我愛劉德華，你係咪真係好愛佢？我答佢話係呀，我呢期真係好愛劉德華。」
君如噚日再接受電話訪問，對雜誌報道大笑，只話：「我愛劉德華。」
許晉亨母避談劉嘉玲
許晉亨父母許世勳夫婦大前晚同Julian（許晉亨）前女友劉嘉玲，在中環麗嘉酒店的派對上碰頭，而劉嘉玲更對許老太悉心照料，似乎她們仍保持良好嘅關係。而許老太噚日下晝更出現中環中建大廈，同兩位女伴行街，佢一見記者影相即刻皺晒眉咁話：「有冇搞錯呀！」之後更對記者提問有關嘉玲嘅問題一概充耳不聞，跟住上咗架銀色平治房車離開。
歌手淚水回饋叱咤
商台前晚叱咤頒獎禮，撇除賽果合唔合理，個騷的確比新城頒獎禮好睇，起碼唔會好似新城咁，兩粒鐘頒五十幾個獎，歌手連感受都講唔切，就好似趕鴨仔咁落台，而淨係睇歌手喺商台頒獎禮嘅表現，就知佢哋重視商台個獎多過新城，起碼陳奕迅、謝霆鋒、許志安、梁漢文攞到獎都喊，Twins重喊到好似豬頭咁。
四大天王樂壇風光不再
九十年代四大天王係威係勢，今年商台嘅叱咤頒獎禮四大天王一個都冇到，王菲亦冇嚟，結果只得華仔同張學友有獎，郭富城、王菲同黎明都食白果，而贏家就係鄭秀文、陳奕迅、謝霆鋒、周杰倫同Twins，呢個賽果，反映樂壇真係改朝換代，踏入二○○二年，樂壇四大天王呢個名詞，真係唔需要再存在，講真上年就只係得劉德華keep到天王個勢。
Eason、千嬅唱功高低立見
商台頒獎禮另外一個好睇之處，就係啲歌手要唱現場，結果歌藝就立時見高低。好似楊千嬅唱得獎歌曲《姊妹》時，唱到牽牛上樹兼走音，Twins唱《女校男生》亦不敢恭維，陳奕迅就唱得十分好，你唔好理陳奕迅個格係點，講到唱歌，始終都係佢強項。