韓國男團BIGBANG隊長G-DRAGON（GD）今個月8日被驚爆喺首爾夜會日藉緋聞女友水原希子，兩個人仲公然做出親暱行為，即時惹嚟世界各地嘅傳媒同粉絲關注。消息傳出之後，連日嚟BIGBANG嘅所屬公司YG事務所一直未有就事件作出回應，令外界非常不滿，而噚日節目《演藝家中介》就提到GD嘅緋聞，而YG嘅代表亦難得開聲咁話：「最近因為要準備太陽嘅個人演唱會而忙到手腳唔停，未有時間跟進GD事件，要等演唱會完咗之後先可以確認消息。」咁嘅回應，當然再次惹嚟粉絲嘅不滿喇。

而太陽前晚同噚晚分別喺首爾開騷，演唱會上太陽毫不吝嗇歌喉，落力演唱，其間仲狂脫衣晒胸肌腹肌，令現場女粉絲為之瘋狂。