戒了煙，九年內慳了十萬八萬。停了經，亦慳唔少衞生巾錢。女性朋友們還說我幸運，因為我不化妝，所以應慳了兩層樓！！！

我從來感受不到化妝的麻煩，直到我開始拍電視，要化妝，真辛苦。天時熱，流晒汗，本可一手抹掉汗水，化妝又會抹花塊面。化了妝原來真的比沒有化妝熱得多，很焗的。出了汗，汗水加粉溶在一起，漿住塊面，很不舒服的。

起初畫眼更想死，Rick Chin哥哥拿着眉筆，挖起我隻眼，篤支眉筆入我眼皮內，嘩！救命呀！立即標晒眼淚，叫晒救命。一流眼淚，面上的妝又花了。真的不明白女人為甚麼天天可以篤支筆入眼？！好痛㗎！唉！原來痛真的可以習慣的。拍了七十集《蘇Good》，之後Rick Chin又為我拍廣告化妝，我竟然眼都唔眨呢！！！

Rick和美女助手Ceci在幫我化妝時，有個很特別，又平又有用的工具「髮貼」。很多人都會像我，額前有頭髮，有時做mask或化妝時，甚至落妝時都很麻煩。大多數人會用headband、shower cap、髮夾。日本人發明了一塊像魔術貼的東西貼在髮上，頭髮便乖乖的不會掉下，最重要是不會有痕迹，頭髮不會扁了、凹了；很聰明的發明。

看清楚，魔術貼有一個個細細的鈎，但這個髮貼的鈎是比較直的。Rick說想當年他試過用魔術貼去hold住頭髮，到想放低頭髮，痛過生仔！！！就是鈎太曲，現在的髮貼，perfect！非常好用。

（原文刊於2009年716期《飲食男女》）

蘇施黃Profile
資深電台人，天生異「口」，除了講嘢叻，食嘢同樣嘴刁，近年開咪、上電視做主持都不離教人食得精，吸引大批粉絲跟佢搵食。

立即免費下載《飲食男女》App ： http://onelink.to/etwapp
《飲食男女》網站 ： http://etw.hk