【傾家蕩產買碟投票】須藤凜凜花驚爆婚訊 宅男粉絲嗌自殺
AKB48NMB48須藤凜凜花
年僅20歲嘅NMB成員須藤凜凜花,今年打入20位即驚爆結婚消息。
【新增內容】日本偶像界盛事「第9屆AKB人氣總選」已曲終人散,指原莉乃三度登上一姐寶座、二奶命嘅渡邊麻友更宣佈畢業結束10年AKB生涯,不過最令人O嘴就係年僅20歲嘅NMB48成員須藤凜凜花,於台上忽然宣佈結婚消息,嚇壞大批男fans。
今年打入第20位嘅NMB48成員須藤凜凜花,以20歲之齡在台上講感言是忽爆婚訊,台下隊友不禁驚訝掩嘴,最後全場更半信半疑下賀佢結婚。日本雜誌《週刊文春》噚晚公佈須藤凜凜花緋聞贈慶,拍得佢於本月8日晚收工後密會任職醫護人員嘅男友,當晚更在男友寓所過夜,事務所發言人已代為承認婚訊,又透露凜凜花將會舉行記者會交代婚事。
凜凜花於2013年加入NMB後即受到公司力捧,兩年後為NMB單曲《榴槤少年》擔任主唱,今次佢所得票數為31,779票,據知有痴心粉絲為凜凜花傾家蕩產買碟投票,狂掃多箱CD後家中堆積如山,不少宅男粉絲表示大受打擊,更有人於網上留言聲稱話要自殺。