香港書展2005今日正式開鑼，一連六天灣仔勢將擠滿書迷。作為一年一度的夏季盛事，書展去年破紀錄50萬人次入場，但當中究竟有幾多人是為書而來？書展搞簽名會是宣傳新書的老伎倆，前數年女性作家個個整妝獨賣個人嘜頭，近年偶像出書成風，風頭早已蓋過她們。作家偶像化沖淡書展氣氛，難怪近年書展特別將簽名會移到場外舉行，為秩序、亦為書展着想。
記者：邵超
攝影：楊錦文

名人明星簽爆書展

詩曰：「一年容易又『書展』，早起夜眠忙不休。」今年書展逾三百節的簽名會，Fans和書迷難以逃過排隊之苦！陶傑、谷德昭、少爺占、茜利妹、丘凱敏等是書展常客，最特別是林一峰、at17、周麗淇、方力申、梁洛施、關智斌等歌星一窩蜂做作家，推出的書包括散文、美容和教育等熱賣題材，快快上網Check番簽名會時間表！

今年書展再變種？

作家：嚇窒真正書迷

叱咤903DJ少爺占：「𠵱家真係好似人人都出書，以往受歡迎的廣播劇推出文本由電台出版，但商台出版部已解散，今年商台找來皇冠青春文化幫我出書，《八王子》的故事是我跟時下年輕人分享九十年代成長的回憶，由阿興執筆。」
年輕作家王貽興：「九十年代是很特別的，以前行書展，簽名會氣氛好好，現在擺在展館外面搞，個個當作家是明星，重要排晒隊真係嚇窒想同作家交流的書迷，我覺得九十年代無秩序那種簽名會至有意思。」

文化人：請下一番苦功

文化評論員梁文道：「我唔反對明星寫書，書從來只係一個媒體，唔一定要係專職的、優秀的人至可以寫，人人都可以出書。香港只有一個叫娛樂圈，問紅歌星幾時拍戲，演員幾時唱歌，現在只係問多樣幾時出書啫。不過一個人進入一個媒體，應該對自己有要求，文字和內容都要做得好，譬如麥當娜出童書都下過一番苦功啦！」

出版商：請分開明星和作家

商務印書館關永圻：「有明星的場合熱鬧啲，係有正面的影響，Fans一場嚟到都會行吓。事實年年多咗人買書，入場人次都有突破。大會努力搞研討會和活動嚟吸引書迷，不過簽名會方面，如果可以的話，應該分開明星和嚴肅的作家，讓書迷可以在參展商攤位跟作家交流，唔使一邊熱鬧，一邊冷清。」

今年話題作

政治代表

每年次文化堂都會搵政治代表人物玩一番，曾生上任即成寫書材料。

國際猛人

國際文化村展館以法國參展商最強，請來三位著名法國漫畫家助陣。

書展追星攻略

港灣道睇星

追星的書迷，請集結在一號天橋走廊和博覽道入口大堂，你可以在書展網頁找到簽名會的時間表。估計屆時港灣道入口的上落客站，將會星光熠熠。

簽名會派200籌

每個簽名會將派出200張紙籌，取得紙籌後才可以排隊領取簽名。索取紙籌的方法，一般是到替你的偶像出版新書的出版社攤位購買該書，便可獲發紙籌乙張。

今日9時恭候

以最快時間攞籌，就要留意書展的開放時間，一般為上午10時至晚上10時，首天提早於上午9時開放。周末繼續有夜書市，開放至凌晨12時，而最後一天則於下午6時收爐。

一小時前報到

今年簽名會密集，每個簽名會完畢後才可以排下一個簽名會的隊，所以攞籌後不妨在簽名會一小時前留意排隊情況，再決定幾時排隊！

保留票尾入場

簽名會場地設於展館外，記住保留入場券票尾及簽名會紙籌，簽名後才可以重返展館。