貿易戰、加息、資產價格、消費，似乎一環扣一環。環球資產價格飛升，近年為消費帶嚟動力。資產價格相對國民收入係天文數字，只要出現具意義跌幅，影響消費程度會相對嚴重。

從上游商品以至生產設備銷量大幅上升，遲早推高生產成本以至通脹，美國加息係正路之途。私募基金近年頻頻槓桿買資產，當美息升至3厘，面對資產回報率只有3厘幾，槓桿投資者會全體消失，環球資產市場單靠大陸佬係唔容易支持落去。資產價格升浪結束冇人能夠阻到，但斷唔會因為美息上升而人為地結束。

華府阻止加息嘅兩個選項，第一係增加對通脹嘅容忍度，但忍極有個譜，而近期特朗普發動貿易戰，突然成為新選項。當市場走向悲觀、前瞻性經濟指標回落時，就大條道理放慢加息。拉長資產價格升浪，同埋阻止中國發展科技進程，對美國而言，實在難分清邊樣更逼切，但貿易戰竟能一石二鳥。

留意吓2年期同10年期美債孳息率曲線不斷收窄，分析認為市場對美國經濟前景審慎，換個角度睇，可以話市場覺得美國長遠加息有個譜。喺股市，地產股唔上唔落，唔同板塊股價相對冷靜、理性，亦顯示市場相信美國喺文章開首嘅唔同因素之中取之平衡，計晒數非為撩交打。若市場當正打仗，恐怕恒指早就冇二萬四了。

港股重創841點，二三線股跌幅相比2、3月時少。個別教育股同醫藥股喺港股跌500、600點時仍有得升，跟住跌到700、800、900點，呢類股先開始驚埋一份。當然，假如每日跌1,000、2,000點嘅真股災來臨，係冇股頂得住，但跌得一兩棍市況即回穩，能夠強勢就係跌500點時都不怕嘅教育股同醫藥股。所以講策略、守定係走，不妨先講手上係乜股。

晉佳

https://www.facebook.com/advanceguy1/