淫照風暴席捲全港，繼好多女藝人/偽人爭相否認影過淫照，或話啲相係移花接木後，政界名人亦爭住否認睇過啲相，而且回應呢個問題時，個個都突然變得好天真、好儍，九唔搭八兼語無倫次，完全冇長大到，冇吸取到呢單嘢對假正經、假道學嘅人帶嚟嘅教訓。
農曆新年期間，唔少人見面都會互相問候：「睇過啲相未？」噚日政界幾場團拜，好多高官名人喺鼠年首度現身，八方亦都忍唔住口，問佢哋呢個問題。范太立場堅定咁堅稱自己冇睇過，亦冇「朋友」send畀佢睇。佢仲好天真咁話，啲相屬於人與人之間嘅私隱，冇理由成為公眾焦點。

個個都話自己冇睇過

剛剛喺英國返嚟嘅梁振英亦話自己冇睇過啲相，仲好儍咁話好彩啲仔女喺英國讀書，相信嗰邊會管得嚴啲，同埋應該少啲機會接觸啲相喎。佢好似唔知互聯網無疆界，海外都可以download到啲相嚟睇咁，naive得交關。
至於霍震霆，雖然佢喺立法會代表演藝界，但佢話自己冇睇過啲相，仲話初初以為件事好快收科，點知一發不可收拾，擔心影響年輕人嘅價值觀，但就唔知啲仔有冇睇過。霍公子最無厘頭嘅係，形容事件好似𠵱家嘅天氣咁凍，九唔搭八到八方頭都側埋，絕對有理由相信佢冇長大到。
德成局長嘅解釋就比較合乎邏輯，佢話過年同屋企人返咗珠三角玩，冇上網亦冇睇新聞，所以亦冇睇過啲相。不過佢亦假道學一番，話團拜席間好多地區人士同教育界都同佢講，經過今次事件要加強德育，佢都好贊同喎。
另一邊港大團拜，校長徐立之一聽到八方問點睇淫照事件同有冇睇過，佢只係話學生已經係成年人，好多嘢都冇辦法管佢哋，又話大學係學術自由之地，學生可以自由表達唔同嘅意見。但港大學生事務長周偉立就好緊張，話已經叫晒校內嘅資訊科技人員監察server，如有人將淫照放喺內聯網，會立即鏟除；如發現有學生用校內網絡連結上載或發放有關淫照，雖然唔會報警拉佢，但會召見有關學生，同將事件交畀學生紀律委員會處理。周教授話，就算唔會踢呢啲學生出校，都要罰！