今早咪同大家講過，話太陽娛樂老闆周焯華(洗米華)太太陳慧玲(Heidi)懷孕四個月，日前(12號)仲由澳門來港買BB用品，主要都係揀藍色，似乎呢胎係仔喎。

晚上7點半，洗米華夫婦雙雙現身灣仔君悅，出席李連杰發起嘅香港壹基金慈善拍賣晚會。陳慧玲身穿及膝半截裙同高跟鞋，蹺實洗米華進場，大晒恩愛，步履輕鬆，已隱隱見到腹部微隆。

洗米華夫婦未有停低受訪，現場傳媒即上前追訪，問周太係咪陀B四個月？佢就報以微笑，未有回應。再問洗米華開唔開心？佢又笑一笑，唔答。

由於記者追訪，故洗米華全程護住老婆，呵護備至，期間有記者跌低，情況一度混亂。咁啱得咁橋，有讀者話啱啱喺香港見到MandyLieu現身，單拖上陣著黑衫，坐的士到養和，同護士講佢肚痛。又會真係咁啱嘅？