擁有1.3萬名員工嘅本地第二大銀行集團中銀香港，啲員工喺下個禮拜，就知今年加薪幅度有幾多，最近佢哋間寶號已經知會所有同事，下周一大家就會收到個別通知，加薪多少屆時揭盅，然後到下周五去銀行碌簿仔，就可以即時慶祝一吓，當月薪酬仲會追溯埋4月底起嘅應有加幅。
不過，成間銀行嘅平均加薪幅度，就仿效本地第一大行滙豐咁，實行保密制，不作公佈，費事互相比較。據華華打探，4月中時候，分紅非常和味嘅前線銷售部門，今次加幅就未必會再有咁多，但要知龍與鳳，就留番下周至有分解。會唔會有人冇得加？今時今日就梗係有可能，不過主要都係考核評級極差嘅小部份員工啫。
雖然唔少人話中資行嘅人工比鬼子佬行低，但其實中銀香港整體薪酬組合，都算多番份人情味，佢哋除咗喺4月派過花紅外，每年年底仲保留派發第13個月嘅年終獎金。

高層責任保　費用五百幾萬

除咗中銀外，佢阿媽中國銀行，對幫佢做嘢嘅人都有畀保障，鑑於Enron事件嘅教訓，好多大企業都開始替高級管理層購買責任保險，一旦有乜大件事發生要俾人告，都有一重保障。中行噚日就公佈，續保董事、監事同埋高管人員嘅責任保險。
中資機構替高層購買責任保險，內地並不常見，但中行咁樣做，都係與國際併軌嘅先進做法。公告話，今年4月27日，董事會已經批准中行向華泰財產保險、美國美亞保險、美國聯邦保險、安聯保險及中銀保險等公司，續保總額達5000萬美金嘅董事、監理及高管責任保險，保費唔超過70萬美金（546萬港元）。
[email protected]