花旗次級按揭市場危機繼續惡化，但冇影響前晚個市，大戶用併購消息炒個市上去，開市冇幾耐就升咗百幾點，跟住一直喺高位橫行，明顯係大戶挾淡倉嘅手法。其實唔係話次級按揭市場啲壞消息冇影響，只係喺假期氣氛充斥嘅情況之下，大戶挾倉好容易，睇吓港股就知道。
昨日港股見花旗股市挾高，日股又挾高，大戶正中下懷，挾埋一份，都係同花旗個款一樣，挾高咗就唔升唔跌，睇吓短線嘅淡友敢唔敢揸住啲空倉放長假，所以話，股市可以好複雜，又可以好簡單，分別只係你對眼有冇俾個錢字遮住，遮住對眼自然睇唔到本來可以睇到嘅嘢。

前晚花旗個市升，唔單止炒併購，英國同伊朗喺英軍被捕事件，可能有機會透過外交途徑解決，油價跌番啲，所以美股有支持，不過，大家都知道呢啲只係炒作藉口，期油炒家推油價上嚟落咗好多工夫，睇嚟起碼要試一試70美元關口，圖表顯示，油價已喺支持位企穩反彈，只要有少少藉口（包括自己製造嘅藉口），都可以炒番上去，呢排金銅鐵股都幾硬淨，放完假番嚟好可能會大幅炒上。
江銅C輪1247：江銅（358）喺3月5日見7.70元低位之後，即刻以「島形」炒上，上禮拜俾9.90元個阻力位攔住出現調整，呢個禮拜就好生猛，破9.90元之後，下個目標係12.20元，可以諗吓隻江銅C輪1247，昨日收33仙，槓桿率3.1倍（有效2.7倍），正股升上12.20元，1247應該喺50仙樓上，正股跌穿9.60元止蝕。