【多圖.高空直擊】32B小清新 「29+1」樂瞳下水拜師
樂瞳學游水獨家專訪NicSir
樂瞳話身上有三條線好重要,分別係手掌上嘅事業線、胸前事業線同埋腹部人魚線,為咗呢三條線,樂瞳近日搏命做運動消脂,除勤力做gym、跳絲帶舞兼學打泰拳,近日仲跟星級游水教練Nic Sir學游水,樂瞳希望同身上贅肉講bye bye。《蘋果》日前直擊樂瞳第一堂習泳,佢表現中規中矩。
樂瞳話從前只愛靜,不好動,亦怕辛苦抗拒做運動,所以就揀咗學彈琴同品酒。但過去一年,佢興趣改變,不停發掘新嗜好挑戰自己。炎夏殺到,鍾意水上活動嘅樂瞳,佢話曾考過潛水牌,又想玩滑水同滑浪,雖然明白唔識游水都可以玩呢啲水上運動,但吓吓要着住救生衣玩冇咁有型,就係為咗做「型女」,樂瞳下定決心今夏要學識游水,佢日前拜Nic Sir為師,Nic Sir出名十堂可以教曉學生游水。
32B嘅樂瞳特別為下水禮買了紅色兩件頭泳衣,夠晒搶眼,佢先跟Nic Sir池邊做熱身運動,稍為拉筋才下水,Nic Sir表示第一堂唔會太高要求,先要樂瞳熟習水性,所以教佢蛙式撥水動作,樂瞳細心聽,用心練,跟着教佢用手㬹頂近池邊學踢水,又教佢拎浮板踢水,樂瞳都大膽嘗試。Nic Sir大讚樂瞳表現好,而樂瞳就話:「其實我六年班時,媽咪同我報過summer course,當年學唔識,但呢次我下定決心,我有信心唔使十堂都學識,因為近年做多咗運動,手腳協調好啲,身上運動細胞又活躍咗。」
始終游水係全身運動,樂瞳希望有助極速練得人魚線:「目標係想練到,但我有少少為食,盡量多管齊下,希望快啲收身,收靚身形,我會好努力,希望夏天完結前可以有齊晒啲線。」