【馬尼拉直擊】「水行俠」積遜想重臨香港 溫子仁自爆係港產片粉絲
温子仁積遜莫瑪水行俠安芭赫德
即將於本月20日上映嘅DC大作《水行俠》(Aquaman)於中國大收,男主角積遜莫瑪(Jason Momoa)、女主角安芭赫德(Amber Heard)及導演温子仁(James Wan)就專程再次到訪亞洲,飛抵菲律賓馬尼拉出席記者會及紅地毯活動。噚晚嘅紅地毯活動上粉絲非常熱情,由頭尖叫到尾,3位主要人物都話估唔到呢度嘅粉絲可以咁瘋狂。安芭赫德同粉絲打完招呼後就首先接受《蘋果》訪問:「我嘅天,真係好正!睇下呢度啲人,真係令人難以想像。」一向力撐女權嘅佢更表示:「任何仍然可以於呢一行生存落去嘅女演員都係超級英雄。」
「水行俠」積遜莫瑪鍾意遊歷四方,原來一早已經同香港結緣:「當我20歲嗰陣我都去過(香港),我可以20年之後再嚟,一定好正。」仲話好想嚟香港拍戲,但唔止佢,連導演溫子仁都自爆係港產片粉絲,問到佢會唔會考慮將香港元素放入新作品?佢就話:「當然!我好想,我好想去香港拍戲,我嘅天!一定會好正。」如果成事香港觀眾就有福喇。
精選娛聞,喺晒《娛果》
http://fb.com/appledailyent
積遜莫瑪、安芭赫德及導演温子仁到馬尼拉,宣傳《水行俠》
「水行俠」積遜莫瑪鍾意遊歷四方,原來一早已經同香港結緣