【光復屯門】大媽為保收入狂收兵 伯伯鐵粉愛聽歌如追星
蘋果日報 2019/09/19 06:00
利是打賞娜娜逆權運動光復屯門公園Happy伯屯門大媽
龍兒(左二)在屯門大媽群中突圍而出，大受大叔歡迎。
屯門大媽收錢3部曲，首先下午到屯門公園Fan Meeting粉絲見面會收利是，然後晚上酒樓包場開P，繼續賣枱收利是，最後就是收兵「求包養」，氹得「鐵粉」照顧日常起居，生活無憂。《蘋果》發現在小月生日會晚宴上，「龍兒」為最受歡迎的年輕大媽，散席後未有放軟手腳，由大叔「鐵粉」邊談心邊送返屋企，平日更有「運輸兵」的士司機變身私人司機管接管送。有資深檔主透露，大媽有足夠人氣，檔主才會找上邀請開工，故大媽們為保障收入都會好好經營一套「收兵策略」。
長髮披肩、溫文爾雅的大媽龍兒，年約40歲，年紀比其他濃妝大媽小一截，她在生日會散席後，由一名居於毗鄰的伯伯結伴回家，二人沿路保持交流，不時細聲講大聲笑，行至一條後巷，她見伯伯顯出疲態，即使自己手挽一個大袋，仍主動挽着伯伯手臂攙扶，只見伯伯甚為受落，充當護花使者回報龍兒好意，直至步行到她家後才分道揚鑣。
光復屯門公園後，龍兒亦少了到歌檔獻唱，記者連日追蹤，發現她平日沒工開，會打扮得樸樸實實，輪流與兩名大叔「鐵粉」飲茶。她每日都相當規律，約中午時出門，然後滿頭白髮、任職的士司機的「運輸兵」早已在樓下等候，然後接載她到酒樓，會合另一名身形高大的中年男飲茶談天，每次都傾足2小時才埋單離開，龍兒亦相當識做，飲茶多數會主動埋單。
午餐後，倘龍兒要到屯公賣唱，「運輸兵」必會開車送她過去。據知龍兒是繼娜娜後，另一受歡迎的屯門大媽，故每次收利是都收到盆滿缽滿，記者更曾見她到找換店，將大量現金匯返家鄉。龍兒冧粉絲確有一手，賣唱前總會買定大量樽裝水及紙包飲品，在屯門公園唱歌時派給圍觀觀眾，部份人就會趁機會打賞利是或現金，記者目測，她一日收賞金過千元。一般到傍晚5時半，龍兒便會收工，然後坐車回家。
在公園內擺檔10多年、熟悉歌檔運作的琴姐指，7.6光復行動後屯公規矩多多，搵食明顯艱難，檔主紛紛組隊轉戰到油麻地廟街、中環碼頭搵食，但大媽要到屯門區外賣唱，必須知名度高、有號召力，確保有足夠鐵粉捧場才會獲檔主批准入隊，故大媽平日用心與粉絲培養感情。她指部份鐵粉更死心塌地，照顧大媽的日常起居，她更透露：「有鐵粉使咗10萬，你肯唔肯使？」
記者曾嘗試跟龍兒做訪問，她拒認到屯門公園賣唱，只稱「我嚟呢度玩係咪唔得？」拒絕訪問。不過有熟識龍兒的街坊透露，龍兒來自廣東，在屯門公園唱歌約4年，對於大媽有「鐵粉」管接管送，他直言：「10個（大媽）有10個都係咁，要畀返約200蚊一日。」更指他們其實是保鑣，以保護大媽的人身安全。
在屯門公園聽歌近10年霍先生指，歌迷與大媽關係融洽，全因大媽唱歌成為他們的唯一娛樂，「退咗休無乜消遣，唯一娛樂就係嚟聽歌。」他又形容部份人更如歌迷追偶像般，「每日都嚟，唔聽唔舒服。」但他強調歌迷打賞是欣賞歌手，「純粹係娛樂，冇出面傳言黃色嗰啲。」另一名伯伯直認追捧其中一名大媽：「日日嚟，係忠實fans」更指每日打賞過百元，「開心吓，當打麻雀輸咗！」
你敢爆，我敢獎！ 立即WhatsApp《蘋果》24小時爆相爆片熱線 或致電：63836568
主角小月大切金豬後，即有粉絲送上利是祝賀。林熊攝
龍兒平日不愁寂寞，陪大叔鐵粉飲茶成為日常工作。
龍兒平日有「運輸兵」管接管送。
大叔鐵粉不時相約龍兒茶聚。